Azərbaycan Respublikası Prezidentinin 2013-cü il 24 iyun tarixli, 2966 nömrəli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı” nın  müvafiq bəndinin icrası ilə əlaqədar təhsil müəssisələrində təhsil işçiləri, məktəblilər və tələbələr arasında narkotiklərin insan orqanizminə məhvedici təsiri, törətdiyi sosial bəlalar, erkən müalicənin labüdlüyü həmçinin narkomanlığın cəmiyyətə və insanların sağlamlığına ziyanı barədə təbliğatın müasir üsullarla aparılması məqsədilə Təhsil Nazirliyi və digər aidiyyəti qurumların təşəbüssü ilə “Sağlam həyat” Respublika Məktəblərarası Debat Forumu keçirilmişdir.

  Təhsil Nazirliyinin təşkilatçılığı ilə keçirilən tədbirdə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupunun, Daxili İşlər Nazirliyinin, Səhiyyə Nazirliyinin,Gənclər və İdman Nazirliyinin, Ailə, Qadın və Uşaq Problemləri üzrə Dövlət Komitəsinin əməkdaşları və digər aidiyyəti strukturların nümayəndələri, çoxsaylı müəllimlər və tələbələr iştirak etmişlər.

  Bununla yanaşı Dövlət Proqramının müvafiq bəndinin icrasından irəli gələn vəzifələrin yerinə yetirilməsi məqsədilə Dövlət Komissiyasının İşçi qrupu tərəfindən hazırlanmış əyani vəsaitlər (bukletlər, “Narkotiklər haqqında həqiqəti bilin” adlı yaddaş kitabçaları və s.) tədbir iştirakçılarına paylanılmışdır. 

   Tədbir Azərbaycan Dövlət Televiziyası və digər kütləvi informasiya vasitələri tərəfindən işıqlandırılmışdır.