Azərbaycan Respublikası Prezidentinin 24 iyun 2013-cü il tarixli Sərəncamı ilə təsdiq edilmiş “Narkotik vasitələrin, pisxotrop maddələrin və onların prekursorların qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”nın icrası ilə əlaqədar rayonun Gənclər və idman, Polis idarələri, Təhsil, Səhiyyə şöbələri və Abşeron Rayon İcra Hakimiyyəti başçısı yanında yetkinlik yaşına çatmayanların işləri və hüquqlarının müdafiəsi üzrə Komissiya ilə birgə tədbirlər planı hazırlanmış, həyata keçməsi üçün işlər aparılmışdır. Belə ki, tədbirlər planına uyğun olaraq Təhsil şöbəsinin işçiləri məktəblərdə və məktəbdənkənar tərbiyə müəssisələrində “Narkotik maddələrin cəmiyyət üçün mənfi təzahürləri” Narkomanlığa və QİÇS-ə qarşı mübarizə mənəviyyatın xilası deməkdir,” “Narkotik maddələrin cəmiyyətdə törətdiyi fəsadlar” və s. mövzularda “dəyirmi masa”lar və yığıncaqlar keçirmişlər.
“Narkomaniya və narkotik maddələrin qanunsuz dövriyyəsinə qarşı mübarizə” haqqında verilən fərman və sərəncamların icrası ilə əlaqədar və eləcə də narkotik vasitələrin, psixotrop maddələrin və prekursorların qanunsuz dövriyyəsi və narkomanlığın yayılması ilə mübarizə üzrə Proqramın həyata keçirilməsi sahəsində rayon komissiyası bir sıra tədbirlər həyata keçirmişdir.
Yeniyetmə və gənclər arasında müntəzəm olaraq “Mənim yaxınım narkoman olsa” mövzusunda sosioloji sorğu, narkotikasız sağlam həyat mövzusunda rəsm sərgisi və “Narkomanlığa qarşı mübarizə mənəviyyatın xilası deməkdir” mövzusunda inşa yazı müsabiqəsi keçirilmişdir.
Narkomanlığın profilaktikası mövzusunda kütləvi informasiya vasitələrində materiallar verilmiş, təbliğat və maarifləndirmə işi aparılmışdır. Qaçqın və məcburi köçkün yeniyetmə və gənclərin məskunlaşdığı yerlərdə təbliğat və maarifləndirmə işləri həyata keçirilmişdir.
Gənclər və idman idarəsinin bu sahədə gördüyü ən mühüm tədbirlərdən biri gənclərin sağlam həyat ruhunda tərbiyə olunması, asudə vaxtlarının səmərəli keçirməsidir. Bunun üçün idman tədbirlərinə geniş yer verilir və belə tədbirlərin keçirilməsinin kütləvi hal almasına çalışılır. Rayonumuzda kütləvi idman növlərindən olan futbola və karateyə daha çox gəncləri cəlb etmək üçün bu idman növləri üzrə rayon birincilikləri keçirilir. Respublika səviyyəli yarışlarda iştirak edilir. Artıq 8500-ə yaxın gənc idmanla məşğul olmağa cəlb edilmişdir və RİH-in müvafiq komissiyalarının iştirakı ilə narkotik vasitələrin psixotrop maddələrin prekusorlarının qanunsuz dövriyyəsi ilə mübarizəyə həsr olunmuş seminarlar keçirilmişdir.
Dövlət Proqramının icrası ilə əlaqədar “Xaş-Xaş-2014” şərti adlı kompleks əməliyyat axtarış profilaktik tədbirlər planının həyata keçirilməsi ilə əlaqədar Abşeron Rayon İcra Hakimiyyətinin yerlərdə nümayəndəliklərinin və Abşeron rayon polis idarəsinin rəhbərliyinin iştirakı ilə Xırdalan şəhərində, kəndlərdə, məktəblərdə və bunlara misal olaraq Xırdalan şəhər 1,2,3,5,9 saylı tam orta məktəblərində, Qobu qəsəbə 1,2,3 saylı orta məktəblərində Mehdiabad qəsəbə 1,2,3 saylı orta məktəblərində və Hökməli qəsəbə tam orta məktəbində “Narkomaniya əsrin bəlasıdır” və digər mövzularda yeniyetmələr çıxışlar etmişdir.
Rayon ərazisində narkotik tərkibli bitkilərin qanunsuz əkinlərini aşkar etmək, narkotik vasitələrin hazırlanmasının qarşısını almaq məqsədi ilə narkotiklərlə mübarizə qrupunun əməkdaşlarının rəhbərliyi altında və digər xidmət sahələrinin iştirakı ilə əməliyyat-axtarış tədbirləri keçirilmişdir.
Abşeron Rayon Polis İdarəsinin narkotiklərlə mübarizə qrupunun əməkdaşları daxil olmuş məlumatlara əsasən narkotiklərlə bağlı bir sıra tədbirlər həyata keçirmişlər. Keçirilmiş əməliyyat tədbirləri nəticəsində 2015-ci il ərzində narkotiklərlə bağlı 109 cinayət faktı qeydə alınmışdır. Bunlardan 20 fakt satış, 3 fakt əkin 86 fakt narkotik vasitələrdən istifadə etməkdir. Tutulub saxlanılanlar arasında 107 nəfər kişi, 2 nəfər qadın olmuşdur.
2015-ci il ərzində rayonun qəsəbə və kəndlərində yerləşən ümumtəhsil məktəblərində, Xırdalan şəhər Heydər Əliyev Mərkəzinin akt zalında rayon komissiyasının təşkilatcılığı ilə Abşeron Rayon İcra Hakimiyyəti və Milli Qeyri-Hökumət Təşkilatları Forumu tərəfindən “Narkomanlığa qarşı mübarizədə vətəndaş cəmiyyətinin rolu” mövzusunda geniş seminar keçirilmişdir. Seminarın işində Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi qrupunun məsul işçiləri Raqif Allahverdiyev, Şahin İsmayılov və Milli Qeyri-Hökumət Təşkilatları Forumunun prezidenti Rauf Zeyni iştirak etmişlər. Keçirilən tədbirlər kütləvi informasiya vasitələrində geniş işıqlandırılmışdır.
Fuad Cəbrayılov,
Abşeron Rayon İcra Hakimiyyəti başçısının
müavini, Narkomanlığa və Narkotik Vasitələrin
Qanunsuz Dövriyyəsinə Qarşı Mübarizə üzrə
Rayon Komissiyasının sədri
