2013-cü ilin altı ayı (yanvar-iyun) ərzində ölkə üzrə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə sahəsində həyata keçirilmiş tədbirlərin vəziyyəti Dövlət Komissiyasının İşçi Qrupunda ümumiləşdirilmişdir.
Belə ki, cari ilin ötən 6 ayı ərzində narkotiklərlə mübarizə sahəsində hüquq-mühafizə orqanları tərəfindən 1571 fakt aşkar edilmiş və həmin faktlar üzrə qanunsuz dövriyyədən ümumi çəkisi 588 kq-dan artıq müxtəlif növ narkotik vasitələr götürülmüşdür. Müsadirə olunan narkotik vasitələrin, psixotrop maddələrin və onların prekursorlarının 262 kq 901,71 qr-ı marixuana, 120 kq 284,924 qr-ı həşiş, 85 kq 588,864 qr heroin, 82 kq 359,29 qr-ı tiryək, 36 kq 158,308 qr-ı psixotrop maddələr, prekursorlar və digərləri təşkil etmişdir. Ümumilikdə qanunsuz dövriyyədən çıxarılan narkotik vasitələrin 44,5 fazini marixuana, 20,4 faizini həşiş, 14,4 fazini heroin, 13,9 fazini tiryək və 6,1 faizini psixotrop maddələr, prekursorlar və digərləri təşkil edir.
Həmçinin ölkədə “XAŞ-XAŞ-2013” şərti ad altında həyata keçirilən tədbirlər nəticəsində qəsdən əkilib becərilən və yabanı halda bitmiş 178 ton 978 kq-dan artıq narkotik tərkibli bitkilər yaşıl kütlə halında aşkar olunaraq məhv edilmişdir.
Cinayət məsuliyyətinə cəlb edilən 1225 nəfərdən 17 nəfəri xarici ölkə vətəndaşları olmuşdur (8-i İran İslam Respublikası, 6-ı Rusiya Federasiyası, 2-i Gürcüstan, 1-i Türkiyyə vətəndaşlarıdır).
Təqdim olunan hesabatlarda Daxili İşlər Nazirliyi tərəfindən görülmüş kompleks tədbirlər nəticəsində narkotik vasitələrlə bağlı 1482 cinayət faktı aşkar olunmuş (ölkə üzrə cinayətlərin 94,3 fazini əhatə edir), 350 kq 503,366 qr (götürülən narkotik vasitələrin 59,5 fazini təşkil edir) müxtəlif növ narkotik vasitələr qanunsuz dövriyyədən çıxarılmışdır.
Milli Təhlükəsizlik Nazirliyi tərəfindən narkotik vasitələrin qaçaqmalçılığı və qanunsuz dövriyyəsinə qarşı keçirilmiş tədbirlər zamanı, 22 cinayət faktı üzrə 132 kq 302,981qr narkotik vasitə dövriyyədən çıxarılmışdır.
Dövlət Gömrük Komitəsi tərəfindən 57 fakt aşkar olunmuş, həmin faktlar üzrə 60 kq 702,524 qr narkotik vasitə qanunsuz dövriyyədən çıxarılmışdır.
Dövlət Sərhəd Xidməti tərəfindən keçirilən tədbirlər nəticəsində 10 fakt üzrə 45 kq 070,305 qr narkotik vasitə qanunsuz dövriyyədən çıxarılmışdır.
2013-cü il 25 iyun tarixdə Dövlət Komissiyasının İşçi Qrupunun təşkiiatçılığı ilə məhkəmələrin qanuni qüvvəsinə minmiş 157 hökmləri üzrə müsadirə olunan 375 kq-dan artıq narkotik vasitə, psixotrop maddə və prekursorlar yandırma yolu ilə Məhvetmə Komissiyası tərəfindən məhv olunmuşdur.
Səhiyyə Nazirliyinin hesabatına görə 6 ayı ərzində ölkə üzrə narkomanların sayı sabit olaraq 27 min 910 nəfər təşkil etmişdir.
Həmçinin, Dövlət Komissiyasının İşçi Qrupu əhatə edən dövr ərzində aidiyyəti dövlət və qeyri-hökumət təşkilatları ilə birgə narkomanlığın profilaktikası istiqamətində Bakı şəhərinin Yasamal, Binəqədi o, cümlədən respublikanın Salyan, Astara, Cəliləbad rayonlarında və Şirvan şəhərində seminar-müşavirələr keçirmişdir. Həmin tədbirlər Televiziyada, müxtəlif Kütləvi İnformasiya Vasitələrində və Dövlət Komissiyasının www.nmdk.gov.az internet saytında işıqlandırılmışdır.
Ölkədə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə sahəsində Azərbaycan Respublikası Prezidentinin müvafiq Fərman və Sərəncamları ilə Dövlət Komissiyasının qarşısında qoyulan vəzifələrin icrasının gedişatı İşçi qrupunda mütəmadi öyrənilir və təhlillər aparılır. Aidiyyəti dövlət qurumları, beynəlxalq və qeyri-hökümət təşkilatları ilə bu istiqamətdə görülən işlərin səmərəsini artırmaq məqsədilə qurumlararası əlaqələndirmə və əməkdaşlıq davam etdirilir.
